Jro Mangku Dalang Warisa

Wayang, Warisan Leluhur sané Adiluhung

Ngawit kapikukuhang dados dalang bulan Oktober 1985, Jero Dalang Mangku Warisa ngawit ngamargiang swagina nyolahang wayang ring makudang genah upacara. Sesolahan wayang sané setata kapaiketang sareng upacara agama puniki ri sapunapiné nénten banget karengayang olih kramané. Sakéwanten yaning kasolahang olih Jero Dalang Mangku Warisa, sesolahan wayang sané kaanggé ring upacara sané sering kasengguh wayang lemah puniki dados matiosan.

Mabekel kabisan ring widang seni sané sampun kalakonin saking mayusa 20 taun, Dalang sané embas ring Désa Tamblang, Kubutambahan, Buléléng puniki, nyabran masolah setata nyinahang reragragan anyar kajangkepin sareng bebaudan génjékan lan kadagingin petuah-petuah seger. Punika ngawinang Jero Dalang Mangku sering kasengguh Dalang Génjék.

Manut titiang, dados dalang ngawi idup titiang lebih séhat lan maguna. Sajeroning makudang galah titiang kasarengang olih Pemerintah Kabupatén Buléléng ngayah bakti, sakadi ring Pura Besakih lan Ulun Danu, Batur. Geginan ngayah sakadi puniki karasayang becik pisan pinaka dalang. Prasida nyinahang rasa bakti majeng Ida Sanghyang Widhi majeng karahayuan kramané,” tutur silih tunggil seniman sané nrima Penghargaan Seniman Tua saking Pemerintah Provinsi Bali (6/7) puniki teges.

Ring yusannyané sané sampun ngenjek 67 taun, nénten dados piambeng dané ngayah ring widang seni. Jero Dalang setata makarya reragragan anyar mangda nyabran masolah setata kasenengin olih kramané. Punika mawinan suluh darsana (filsafat) sané wénten ring makudang-kudang satua sané kaaturang prasida katelebin olih kramané.

Jero Dalang ngaptiang mangda seni padalangan setata ajeg lan kasenengin olih krama Baliné riantukan wayang lan sesolahan wayang wantah warisan leluhur sané adiluhung.

Sumber : Balipost