Ada tuturan satua Pan Balang Tamak. Ia sugih, dueg makruna, dayane liu pesan, tusing nyak kalah teken krama desane. Naging ke solahne ento ulihan bebenehan.
Kacrita jani desane paum, bakal nayain Pan Balang Tamak apanga kena denda. Ditu ia kaarahin, mani semengan tuun siape , desane lakar luas ke alase, ngalih kayu bakal anggon menahin bale agung. Nyen ja kasep bakal kena denda.
Gelisin satua, buin manine, pan balang tamak klanca-klinci jumahne ngentiang siapne tuun. Sawetara suba tengai tepet maro siape tuun uli bengbengane. Ditu mara ia gegresoan majalan nututin desane ngalih kayu ka alase. Saget desane suba malipetan pada ngaba kayu.
Di subane neked jumah, paum kone lantas desane bakal nandain pan balang tamak, krana tuara nuutin arah-arah desane. Ditu kelihane memunyi brangas “ ih, pan balang tamak, jani cai kena denda”. Masut pan balang tamak alus munyine, “ napi mawinan tiang kena denda? Dening arah-arah desane teken tiang, mani semengan tuun siape desane luas ka alase ngalih kayu. Tiang ngelah siap tuah aukud, sedek mekeem. Sawetara kali tepet mara ia tuun. Ditu tiang ngenggalang nuutang sekadi arah-arah desane. “ dadi kalah desane nglawan pan balang tamak, buung ia kena denda.
Kacrita buin manine ia kaarahin ngabo senggauk anggon bekel menahang bale agung. Pan balang tamak ngaba sanggah uug apang benahang baan desane. Dadi bengong desane teken takeh pan balang tamak, ane setata nguluk-nguluk desane.
Yan pin kuda-kuda suba krama desane bakat uluk-uluk baan pan balang tamak, lantas ada keneh desane lakar misekaang pan balang tamak. Ane jani katunasang cetik ane paling meranena teken anake agung, apang balang tamak mati acepokan. Dayane buka keto dingeha baan pan balang tamak, lantas ia memunyi teken kurenane, “ yen deweke mati, bok deweke gambahang tur gantungin tamblulingan, liman deweke pagisinin cabak. Bangken sadahang di piasane, tur ento pangelingin. Yan suba peteng bangken deweke wadahin peti, pejang jumah meten.”
Kacrita jani pan balang tamak suba mati keno cetik. Kurenane nuutin pabesen pan balang tamake. Krama desane natasang ka umah pan balang tamake. Tepukino pan balang tamak nyededeg ngambahang bok, sambilango memantra griem-griem di piasane. Ditu krama desane nguningang cetike tusing mandi teken anake agung. Dadi bendu anake agung sambilango nyicipin cetike ento. Jeg perjani ida seda.
Sesubane peteng ada dusta ajaka papat bakal ngamaling pegelahan pan balang tamake. Di jumah meten tepukino ada peti, laut kapondong abana ka pura desane. Petine ento ungkabango baan dustane, dapetango bangken pan balang tamake nyengkang.
Semenan maro galang kangin, jero mangku mekedas-kedas di pura dapetengo ada peti gede di natah pura desane. Petine ento laut ka sumbah baan jero mangku kadena paico betara. Krama desane masih pada teka, laut nyumbah. Di subane pepek krame desane teka, laut petine kaungkabang, ditu tengkejut mekejang, dapetango bangken pan balang tamake nyegagag. Krama desane uyut mamisuhin. Ada ane memunyi, “ japi pisuhin, kadung bakat sumbah, melutang apa ya!”.
Pemuput masih desane tuyuh menain muah nanem bangken pan balang tamake. Yadiapin suba mati pan balang tamak masih nyidaang melog-melog anak.
E-mail : desa_tamblang@ymail.com
Pan Balang Tamak
Siap Selem
Ada tuturan satua Siap Selem. Ia ngelah panak pepitu, ane paling cerik doglagan, tusing mebulu. I Siap Selem ngajak panak anteng ngalih amah.
saget teka ujan bales. I Siap Selem nginep jumah Meng Kuuk, suba peteng I Siap Selem makeber. Enu I doglagan medem di samping batune. Meng Kuuk teka, jeg nyaplok batu. Meng Kuuk ngeling, gigine pungak. I Doglagan ngalih memene.
I Siap selem nepukin Meng Kuuk gigine pungak. I Siap selem ngigel sambilanga magending. Ngikngak, nginguk, gigi pungak nyaplok batu.
Nah keto upak anak belog.
I Sugih Teken I Tiwas
Ada tuturan satua I Sugih teken I Tiwas. I Sugih, anak mula sugih. Gelahne liu tegal muah carik. Pipisne masih liu. Nanging ia demit, loba muah iriati. Duleg teken anak lacur.
I Tiwas mula lacur. Tusing ngelah apa. Nanging solahne melah. Dueg metimpal. Demen nulungin anak len magarapan. Geginanne ngalih saang disisin alase. Laut adepa ka peken. Sedek dina anu, I Tiwas sedeng munduhang saang, teka Sang Kidang. Kidange ngomong : "ih Tiwas seluk jit nirane". I Tiwas nyeluk jit Sang Kidange. I Tiwas kendel, maan mas, pipis liu. Ia nyembah marep menek. Ngaturang suksema ring Sang Hyang Widhi. Laut ia mulih, bingar.
I Sugih baan lobanne, iri nepukin I Tiwas. I Sugih milu ngalih saang. Tepukina ada kidang ngamah padang. I Sugih nyeluk jit kidange. I Sugih paida, gredega, kanti babak belur. Ia mulih, aduh-aduh.
Keto pikolih anak loba tur iriati.
Men Cubling
Ada tuturan satua Men Cubling. Ia maumah di sisin alase.
Pan Cubling semengan luas megarapan. Ia mamula gaga di tegalne.
Men Cubling ngoyong jumah. Ia nyakan di paon. Suud nyakan, saget ada bojog gede teka. Bojoge nagih sangu muah woh-wohan. Sadina-dina bojoge gede ento kema. Ia nagih amah. Yan tusing baanga, Men Cubling pedihina, galakina. Gelah men cubling telahanga.
Pan Cubling teka. Ia ngalih daya. Pan Cubling nyaru-nyaru mati. Rurubina baan kasa dibalene.
Teka bojoge gede nagih amah. Pan Cubling orahanga mati. Men Cubling ngidih tulung, ngae bangbang dalem. I Bojog gede ngae bangbang ajaka timpalne. Suba dalem bangbange tekepina aji bedeg. Siama aji yeh panes. Bojoge makejang mati.
Keto upah anak demen memaksa gelah anak.
Ni Bawang Teken Ni Kesuna
Ada tuturan satua anak makurenan, ngelah kone pianak luh duang diri. Pianakne ane kelihan madan Ni Bawang muah ane cerikan madan Ni Kesuna.
Solah Ni Bawange ajaka Ni Kesuna matungkasan pesan, tan bina cara yeh mesanding teken apine.
Baan duwegne Ni Kesuna ngae pisuna, ento makrana memene setata ngugu pisadun Ni Kesunane ane ngorahang Ni Bawang ngumbang di tukade ngenemin anak truna.
Dugase ento sujatinne Ni Bawang suud nglesung padi laut kayeh sambilanga ngaba jun lakar ngalih yeh.
Krana ngugu munyin Ni Kesunane, ditu Ni Bawang lantas tigtiga, siama aji yeh anget tur tundena magedi.
Ni Bawang di subane ngutang umah, neked di tukade ketemu ajak kedis crukcuk kuning. Ditu Kedis Crukcuk Kuninge kapiolasan. Ni Bawang gotola, baange emas-emasan, marupa pupuk, subeng, kalung, bungkung, gelang muah kain sutra.
Sesukat Ni Bawang ngelah panganggo ane melah buka keto, ia nongos di umah dadongne.
Kacrita Ni Kesuna kone nepukin embokne mapanganggo melah-melah, laut ia nakonang uli dija maan panganggo buka keto.
Disubane oraina teken Ni Bawang, ditu Ni Kesuna metu kenehne ane kliwat loba. Ia ngorahin memene nigtig ukudane apang kanti babak belur.
Sesubanne katigtig, lantas ia ngeling sengu-sengu ka tukade ketemu teken kedis crukcuk kuninge.
Kacrita I Crukcuk Kuning ngotol ukudan Ni Kesunane, isinina gumatat-gumitit.
Neked jumah, ditu lantas gumatat-gumitite ento mencanen Ni Kesuna kanti ngemasin mati.
Keto upah anake ane mrekak, setata demen misunaang timpal, sinah muponin pala karma tan rahayu.
I Belog
Ada katuturan satua anak belog. Baan belogne ia adanina I Belog. Sedek dina ia tondena meli bebek ka peken teken memene. Ditu lantas ia nyemakin memene pis. Lantas memene buin ngomong, kema jani cai engal-enggal ka peken, terus meli be dadua di tongos dagang bebeke.
Disubane I Belog neked di peken, kema-mai ia ninggalin dagang bebek sakewala ia ngenjuhang pipis dasa tali rupiah. Jero niki jinah, tiang meli bebek dadua. Bebeke aukud aji Rp. 4000. Lantas dagang bebeke ngemaang I Belog susuk bui Rp. 2000. Disubane maan meli bebek lantas I Belog mulih.
Kacrita ia ngemulihang, tur ngaliwatin tukad linggah. Ditu lantas bebeke ngeleb. Maka dadua bebeke ngelangi di tukade. I Belog bengong ninggalin bebeke kambang tur ia ngrengkeng kene. Beh, bebek puyung bakat beli. Awake nagih bebek mokoh tur baat, sakewala bebek puyung baanga. I Dewek belog-beloga. Lantas bebeke tusing ejuka tur kalahina mulih.
Disubana I Belog neked jumahne, ajinanga baan memene tuara ngaba bebek. Memene ngomong, ih belog encen bebeke? Masaut I Belog, "maan ja icang meli bebek, nanging puyung icang adepina teken dagang bebeke. Lantas bebeke leb di tukade, tur ngelangi. Buina laut ulah icang sawireh meli bebek puyung tuara ada gunane.
Ditu lantas I Belog welanga baan memene. Keto upah anake belog, tuara ngresep teken munyi. Bebeke mula kambang yan ia lebang di tukake dalem.
I Lutung Teken Kekua
Ada tuturan satua, I Lutung teken I Kekua. I Lutung sedek mesayuban di beten kayune. Dingeha I Kekua nyeselan iba kene munyine, "beh kene suba lacur. Masan ujan-ujan keweh pesan ngalih amah. Yen mekelo kene, sing buungan awake lakar mati". Mara dingeha munyi keto I Lutung inget. Lantas tongose ento kepaekin. Tepukina I Kekua berag acum, saja mirip tuna amah.
laut I Lutung ngomong nimbal, "Ih Kekua, suud monto meseselan. Awake nepukin tongos melah, dauh tukad Cengcenge ada pondokan. Ento pondokne I Kaki Perodong. Di sisin abianne misi punyan biu. Abulan ane suba liwat, awake maan mentas ditu.
Biune liu ane wayah-wayah, mirib jani suba pada nasak". Beh prajani ilang seduke I Kekua mara ningeh orta keto. Demen kenehne lakar maan ngamah biu nasak. Laut ia mesaut enggal "Aduh sang Lutung, yen keto apa kaden melahne. Nanging kenkenang kema, sawireh pondoke ento joh. Tukad Cengcenge linggah, buina keweh pesan liwat".
Mara keto munyine I Kekua, lantas I Lutung memunyi, "Beh belog iba Kekua. Cai kaden dueg ngelangi. Yen ajak cai satinut, jalan kema sibarengan. Gandong awake, ngaliwat tukad. Cai ngantosang beten dibongkolne, yen maan biu tetelu, cai abesik, deweke dadua".
Gelising satua enggal, majalan kone ia ajaka dadua. Tusing mekelo pajalane, neked ia di sisin tukad Cengcenge. Ngenggalang I Lutung magandong di tundun kekuane. Ngesir pajalan I Kekua nuut yeh, wireh ia dueg ngelangi. I Lutung negak duur tundune, sambilanga kejengat-kejengit. Disubane neked di sisin tukade lantas subarengan tuun, tur saget ada ngenah pondok. Pondokne ento gelah I Kaki Perodong. Lantas ia tolah-tolih natasang Kaki Perodong.
Kakenehang baan I Lutung pondoke suung. Di lantas I Lutung ngenggalang menek punyan biune ane sedeng mabuah nasak. I Kekua ngantosang di bongkol punyan biune.
Gelisang satua I Luung ngempok biu mase ane tasak duang bulih tur pelute make dadua, I Kekua baanga kulitne dogen. Sedeng iteh I Lutung ngamah biu, lantas I Kali Prodong teka, tur ngomong "Bah ne I Lutung ngamah biune, jani kar matiang!". Ditu lantas I Kekua mengkeb di batan punyang biune. Kaki Prodong teka ngaba tumbak lanying. Pejalane adeng-adeng ngintip I Lutung. I Lutung kaliwat kendel kenehne. Ia tusing naen teken kaukan bayane, nu iteh ngamah biu nasak di punya. Sedeng iteha I Lutung ngamah biu lantas katumbek baan Kaki prodong tur beneng lambungne. Ditu lantas I Lutung ulung maglebug ke tanahe tur ia mati. Bangken I Lutung tadtada ka pondokne.
Keto upah anake demen mamaling tur nguluk-nguluk timpal.
Sang Nandaka Muah Prabu Singa Kapisuna
Kacrita di alas Malawane ada kone lembu jagiran aukud, madan Sang Nandaka. Ane dadi rajan alase ditu Sang Prabu Singa. Panjaknyane sawatek asu alase. Pinaka pepatih madan Patih Sambada, I Nohan teken I Tatit. Sang Nandaka muah prabu Singa, masawitra becik-becik. Sang Nandaka ngelarang kapanditan.
Sang Prabu Singa nyambran dina mlajahin tutur kadarman nginutin solah Sang Nandakane sadina-dina mamukti padang, suud mamati-mati, suud mamangsa daging. Dening keto keweh sawatek asune, krana tusing bisa neda padang, ambengan muah don-donan. Ditu lantas paum di batan kayu kalikukune.
I Tatit ngraos teken I Patih Sambada, nerangang panjake pada kasengsaran, berag aking. Masaut Patih Sambada sada kenyem, " ih, ento cai pada makejang, yan kapineh baan I dewek, pasawitran Ida Prabu Singa teken Sang Nandaka tusing adung. Krana bina paksa len kapti, artinne len soroh len tetujone. Jani dewek ngalih daya upaya apang Prabu Singa palas teken Sang Nandaka. "Mara keto lega pesan keneh asune makejang, lantas paumane maluaran.
Nemonin dewasa melah, I Sambamda nyilib nangkil ring Sang Nandaka, ane sedek masayuban di beten kayu bingine. I Sambada ngenggalang nyumbah lantas matur. "Inggih Ratu Pranda mungguing kabecekin pasawitran I ratu ring Sang Prabu Singa nenten nyandang baosang. Sakewenten ampurayang pisan, sane mangking Sang Prabu Singa nyesel raga, antuk kadropon makanti ring I ratu. Ida wantah eling ring raga nilar sesanan ratun buron. Ida ngandika sapuniki, "jani awake tau teken unduk I Lembu, tingkahne corah mapi-mapi sadu. Yadiapin I Lembu matanduk nyanyap, awakne gede, sing keweh awake, ngalap kapatianne".
Keto aturne I Sambada ngadu ada, lantas ia mapamit. Tan kacritayang di jalan, I Sambada suba tangkil teken Sang Singa, nyumbah-nyumbah matur, "Inggih, Ratu Sri Mregapati, titiang nunas ampura! Titiang polih tangkil ring Sang Nandaka. Dane maosang dahat singsal pamargin cokor I Dewane. "sapunike pangandikan dane, "cai Sambada, bapa nuturin cai, buat jelen laksana singane. Tusing pesan ia ngelah idep kapiwelasan, kabatek baan lobanne kaliwat. Punika patut kayunin I Ratu, sampunang I Ratu tleman! Gelisang pegatang pasawitran I Ratune ring I Nandaka. "Sang Prabu Singa kipak-kipek sarwi mapineh-pineh, "tanpa guna tresnan deweke teken I Nandaka! Jani mula sewayan deweke masiat nglawan Nandaka".
Sang Prabu Singa lantas bangun, gegancangan majalan kairing baan I Sambada, I Nohan, I Tatit muah asune makejang, nuju tongos Sang Nandakane.
Sesubane neked di arepan Sang Nandakane. Sang Prabu Singa ngelur ngajengit, tumuli nyagrep baong Sang Nandakane, getihne muncrat. Sang Nandakane ngawales nyenggot, beten lambung Sang Prabu Singane. Pamuputne makadadua ngemasin, pada purusa di payudan.
Nah, tangarin pesan pisunane, krana pisunane manganan teken pedang, sida nguugang pasawitran, kulawarga, banjar muah desa.
Lutung Teken Kambing
Critayang I Lutung malali-lali di sisin alase tepukina I kambing sedek medem beten kayune ngrembun. I Lutung munyine manis nyapatin, "yeh sedeng melaha I Kambing dini. Jalan mesekaa ngae abian kacang lindung. Manian apa ada pupunin !" I Kambing nyautin dabdab, "kenken baan nabdabang apang nyak manut paedumane ? Mani puan apang eda ngranayang rebat matimpal".
I Lutung munyinne getar nyauitin. "kene ento kambing, saluir edon iba ane ngelahang, sekancan buah wake ane muponin. Asing ane lenyok teken subaya apang tusing nepukin rahayu". I Kambing manggutan sarwi ngomong, "nah wake ane nyadia nginutin munyin ibane".
suba pragat subayane ajak dadua, lantas ngawitin ngae abian. I kambing ngedeng tenggala, I Lutung ngatehang uli duri. I Kambing tundune telah kapecutin, kanti balan-balan pajlantah, sasubane lanyah ajaka dadua seleg mamula kacang.
Critayang jani suba mentik melah kacange, sabilang medon amaha baan I Kambing, "bah yen kene undukne pocol makaronan ngajak I Kambin ? Buin pidan kacange lakar mebuah ? Makejang done liglig amah kambing.
I Durma
Ada tuturan satua anak muani bagus madan I Rajapala makurenan ngajak dedari madan Ken Sulasih. Ia nongos di desa Singapanjaron. Ia ngelah panak adiri. Adanina I Durma. Mara I Durma matuuh pitung oton, kalahina teken memene mawali ka kendran. Sawireh keto, I Durma kapiara, kapretenin olih I Rajapala, kanti matuuh dasa tiban.
Gelising satua, I Rajapala makinkin bakal nangun kerti ka alas gunung.
Nuju sanja, I Rajapala ngaukin pianakne laut negak mesila. I Rajapala ngusap-ngusap duur I Durmane sarwi ngomong, "duh, Cening Durma pianak Bapa, tumbuh cening kaasih-asih pesan. Enu cerik Cening suba katinggalin baan meme. Buin mani masih Bapa bakal ninggalin Cening luas ka gunung alas nangun kerti. Jumah cening apang melah !"
Mara keto, jengis I Durma, paningalane ngembeng-ngembeng, tumuli ia mekakeb di pabinan bapane. Tusing nyidayang ia mesaut. Bapanne menehang tegak Durmane tur nutugang mapitutur. "Cening Durma, awak enu cenik, patut Cening seleg malajahang awak. Sabilang gae patut plajahin, nyastra tusing dadi engsapin. Ditu di pasraman jero Dukuh, Cening malajah sambilang ngayah.
Plajahin cening matingkah, ngomong muah mapineh. Tingkah, omong muah papineh ane rahayu palajahin. Melahang solahe mabanjar, mapisaga, eda maguunin rusit teken timpal. Patut Cening asih manyama braya. Nyama brayane pinaka meme bapa muah sameton, tur anggon lima batis sing nyen kaget Cening ngayah ka banjar wiadin matetulung ka pisaga, eda pesan pesu mulihanga gagaen anake. Sekenang pesan magarapan ditu.
Prade ada anak kumatresma, suka olas teken Cening, ento eda pesan engsapanga. Nganging yen ada anak ngawe jele wiadin ngae jengah teken ukudan Ceninge, sasida-sidaan eda walasa. Minab Ida Sang Hyang Widhi tuara wikan nyisipang.
Buina Cening, semu ulate jejerang, kemikan bibihe apang manis, ento anggon ngalap pitresnan anake teken cening. Plajahin ngomong ane rahayu, eda pesan Cening ngae pisuna, ngadu ada, mamokak muah mrekak !
Keto masih eda Cening ngadu daya lengit, ngeka daya nyengkalen anak. Jejerang pepinehe ngulati ane melah. Ingetang setata ngaturang bakti ring Ida Sang Hyang Widhi, matrisandia tetepang.
Nah, amonto malu Bapa mituturin Cening, dumadak Ida Sang Hyang Widhi Wasa sueca mapica kerahayuan tekening Cening muah Bapa !"
Tan kacrita pajalan I Rajapalane nangun kerti,
kacrita jani I Durma suba ngayah, mlajah di pasraman Jero Dukuhe. Jero Dukuh kalintang ledang pakayunanne, krana I Durma seleg pesan mlajah tur enggal ngresep. I Durma tusing milihin gae, asing pituduh Jero Dukuhe kagarap kanti pragat. Sabilang peteng kaurukang masastra baan Jero Dukuh. Baan selegne malajah mamaca, dadi liu ia nawang satua, tutur muah agama.
Sasubanne I Durma menek truna, pepes ia ka bencingah, dadi tama ia nangkil ring Anake Agung di Wanakeling. Para punggawa, tandamantri pada uning, tur sayang teken I Durma. Ditu laut I Durma kaanggen parekan di puri, kadadiang panyarikan sedahan agung purine. Dedinane, I Durma tusing kuangan pangan kinum, muah setata mapanganggo bungah. Yadiapin keto tusing taen ia ingsap manyama braya, setata inget teken pitutur bapanne muah ajah-ajahan Jero Dukuhe. Keto nyen pikolih anake jemet mlajah tur anteng magarapan.
I Kayu Kepuh
Kacerita ada kayu kepuh mentik di tegale ane linggah ditu ada kedis goak luh muani sedeng metinggah di carang kayune. Kedis goake ento kapariangenan nepukin unduke i kayu kepuh, gobane layu, done telah ligir, kulitne telah bulbul mababakan, miribang i kayu kepuh lakar ngemasin mati.
I kedis goak nakonang apa awanan i kayu kepuh buka keto. Mesaut I kayu kepuh "uduh cai goak, ento saja buka munyin caine, mahabara kapanesan icang dini, baan laksana i rare anggon, sadina-dina icang teteka, tur tikahne nektek tan ngitung, setata ngawag-ngawag. Ada masih ane lenan nunjelin bongkol icange, sing ja gigis kapo sakite ane tandangin icang dini. Adenan suba mati tekenan nandang sakit buka a kene".
Ningeh munyine i kayu kepuh buka keto mesaut i kedis goak "ne ada pangupayan icange apanga cai rahayu seger. Apanga suud i rare angon ngusak cai dini" mesaut i kayu kepuh "uduh cai goak tumusang pesan legan caine teken icang, yan saja icang nyidaang seper kanggo cai nitahang dini, sing ada icang bani piwal teken cai" keto pangidihan miwapg pasobayane i kayu kepuh.
Gelising satua i goak lantas nyalanang daya upaya. I goak ngalih bangke ane suba berek, lantas kegantungang di carang kayu kepuhe. Pagulanting bangkene ngebekin carang kayune. Buin mani kacerita i rare anggon pada ngungsi bongkol kayu kepuhe lakar masayuban. Dadine makejang pada melaib sawireh bone bengu, ento awinan i rare anggon tusing taen mesayuban di bongkol kepuhe ento. Mekelo-kelo suba kone ipun i kayu kepuh ngerembeak carange samah, jani i kedis goak elah metaluh di carange i kayu kepuh.
Patutne i rage sareng sami, sandang ngelestariang tanem tuuhe, eda ngawag-ngawag mungel muah ngamatiang sarwa tumuwuhe.
Ni Tuwung Kuning
Ada tuturan satua, anak kereng mamotoh madan I Pudak. I Pudak liu pesan ngelah siap kurungan. Kurenane beling gede, merasa keweh ngencanin siap.
Kacerita I Pudak luas metajen ka Denbukit. Kurenane mebesen kene " yen muane panake ubuh, yen luh tektek baang siap ". Mara meketelun I Pudak luas, kurenane ngelah panak luh. Pianakne kingsananga jumah dadongne. Ari-arine dogen tekteka baamga siapne. Pianakne adanina Ni Tuwung Kuning. Ngancan kelih ngancan jemet Ni Tuwung Kuning magarapan
Yan kudang taun makelone I Pudak luas metajen, critayang jani ia suba mulih pipisne telah kalah, tusing enu angan aketeng. Teked jumahne ia nakonang pianakne. Kurenane ngorahang pianakne luh tur suba tekteka baanga siap.
Siape makruyuk, ngorahang pianakne kingsananga jumah dadongne, tur ari-arine tekteka baanga siap. Kakruyuk siape keto dogen, laut kurenane kaukina. Kurunane konkona ngalih pianakne ka umah dadongne.
Ni Tuwung Kuning aliha ajaka mulih. Teked jumah ia lantas ajaka ka alase. Di tengah alase Ni Tuwung Kuning nagih matianga. Jep teka dedarine nyaup Ni Tuwung Kuning. Ni Tuwung Kuning siluranga aji gedebong. I Pudak sahasa nektek gedebong, abana mulih. Teked jumahne baanga siapne.