Subak

I Putu mula murid jemet pesan. Lenan teken jemet mlajah, ia jemet megae. Satekane uli sekolahan, setata nulungin bapanne magarapan di carike.

Teka uli sekolahan ia bareng numbeg, metekap, majukut, nampadin muah sahanan gegaene di carik.

yen krama subake nuju marerembugan, ia bareng ditu madingehang, pedasanga pesan apa ane raosanga. Yen ia tuara resep, ia tuara kimud matakon. Ia dot pesan nawang paundukan subake. Ento awanan teked jumah ia matakon teken bapanne, "Bapa tiang pepes pesan ningeh anak ngraosang subak, sakewala tiang tonden ngresep. Tegarang bapa nuturin tiang paundukan subake!"

"Beh, melah pesan patakon Ceninge. Kene to Cening, ane keadanin subak tuara len teken sekaa ane ngurusin carik. Jani masih ada subak abian. Anake wikan maosang subake ento suba liu ada di Bali. Yen sing pelih baan bapa, ngawit rauh Resi Markandeya ka Bali.

Subaka ento madasar Tri Hita Karana. Tri Hita Karana maarti tetelu ane ngae rahayu. Pawilangane : Kayangan, Pawongan muah palemahan. Yan di subak, kayangan wiadin puran subake kaadanin bedugul. Pawongan, tuah krama subake, muah palemahane ento carike ane linggah. Maka tetelu tusing dadi palasang.

Subake ngelah awig-awig. Awig-awig subake ada ane matulis ada masih ane tuara matulis. Krama subake setata malaksana nganutin awig-awige ento. Isinne paundukan ngedum yeh, menahin temuku, nabas pundukan, dewasa mamula, muah ane lenan."

sesubanne madingehang tutur bapanne, I Putu mapineh-pineh buka kene, "Beh, yen keto subake patut pesan piara tur anutang teken kamajuan jamane jani."